Ang Institute of Environmental Governance (IEG) Center ng Southern Luzon State University (SLSU), kasama ang Tanggol Kalikasan, Inc. (TK), ay nagsagawa ng mga pagbisita sa mga bayan ng Real, Infanta, at General Nakar sa Quezon upang makipag-ugnayan sa mga bagong halal na lokal na opisyal.
Ang delegasyon ng SLSU, na binubuo ni IEG Coordinator Bb. Arceli R. Obmerga, at mga kawani mula sa Office of Extension Services (OES) na sina Bb. Renelyn A. Barrientos at Bb. Sheer Angela F. Laguador, kasama si Bb. Arcelina O. Molen ng TK, ay nakipagpulong sa alkalde ng Real, Hon. Julie Ann O. Macasaet, alkalde ng General Nakar, Hon. Alfredo Pujera, at sa Municipal Agriculturist ng Infanta na si G. Carmelo S. Francia.
Sa mga pagpupulong, ipinagbigay batid ng grupo ang nalalapit na Fishery Law Enforcement Training para sa mga kawani ng Bantay Dagat sa Real at General Nakar, na gaganapin mula Agosto 5–7 sa National Brackishwater Training Center sa Pagbilao, Quezon. Ang pagsasanay, na pinondohan ng U.S. Department of the Interior’s International Technical Assistance Program, ay naglalayong paghusayin ang kakayahan ng mga kalahok sa tamang dokumentasyon, pamamaraan ng pagsampa ng kaso, at epektibong pamamaraan ng pagpatrolya, upang palakasin ang pagpapatupad ng batas pangkaragatan.
Bukod dito, tinalakay din ng grupo ang plano para sa isang aquasilviculture training program sa Infanta kasama si G. Francia, na nagbibigay-diin sa sustainable aquaculture practices upang suportahan ang lokal na pangingisda at mga pagsisikap sa pagpapanumbalik ng mga bakawan.
Ang mga inisyatibong ito ay nagpapakita ng pangako ng unibersidad sa pagpapalakas ng mga lokal na pamahalaan sa environmental governance at resource management.
Article and Layout: JDMerjudio