SLSU nagsagawa ng SOGIE-SC Seminar para sa inklusibong pamantasan

Dinaluhan ng 987 kalahok, kabilang ang mga guro, kawani, at estudyante mula sa iba’t ibang kampus ng unibersidad, ang aktibidad na nagsimula bandang ala-una ng hapon. Nagsimula ang programa sa pagtatala ng mga kalahok mula 1:00 hanggang 1:30 ng hapon. Sinundan ito ng panimulang programa na kinabibilangan ng panalangin at pag-awit ng Pambansang Awit ng Pilipinas. Naghatid ng pambungad na pananalita para sa pagpapaunlad ng institusyon at mga ugnayang panlabas si Dr. Arvin N. Natividad, DIT, Pangalawang Pangulo para sa Institutional Development and External Affairs (IDEA). Samantala, nagbigay naman ng mensahe si Dr. Frederick T. Villa, DTech, Pangulo ng Pamantasan, na nagbigay-diin sa kahalagahan ng pagkakapantay-pantay at pagiging inklusibo sa loob ng pamantasan.

Ang pangunahing bahagi ng seminar ay ang talakayan tungkol sa SOGIE-SC (Sexual Orientation, Gender Identity and Expression, and Sex Characteristics) na pinangunahan ni Direktor ng Tanggapan ng Gender and Development (GAD), G. Rene P. Zubieto, MA. Sa kanyang sesyon na may temang “Pag-unawa sa Pagkakaiba-iba, Pagtataguyod tungo sa Inklusibong Pamantasan,” tinalakay niya ang mahahalagang konsepto ng SOGIE-SC, ang interseksyon ng gender mainstreaming at diskriminasyon sa loob ng mga paaralan, at ang kahalagahan ng paglikha ng ligtas at inklusibong espasyo para sa lahat.

Isang mahalagang bahagi rin ng programa ang Orientation of the CODI Manual na pinangunahan ni G. Jay Mel Nicomedez, Executive Assistant III. Tinalakay niya ang “Gabay sa mga usapin ukol sa Gender-Based Sexual Harassment at Safe Spaces Act,” na nagbigay-kaalaman sa mga kalahok tungkol sa kanilang mga karapatan, ang tamang proseso ng pagrereklamo, at ang tungkulin ng komite na tiyakin ang patas at kumpidensyal na pagsisiyasat ng mga kaso.

Matapos ang mga talakayan, nagkaroon ng open forum kung saan naging lubos na nakilahok ang lahat ng panauhin. Nagkaroon sila ng pagkakataon na magtanong, magbahagi ng kanilang mga karanasan, at makipagpalitan ng pananaw sa mga tagapagsalita. Ang sesyon na ito ay nagbukas ng mas malawak na pananaw tungkol sa kalayaan, inklusyon, at mga karapatan ng lahat ng kawani at estudyante hinggil sa diskriminasyon at sexual harassment.

Ang “Breaking Barriers, Building Bridges” ay isang deklarasyon na ang SLSU ay isang espasyo kung saan ang pagiging inklusibo ay isinasabuhay at ang bawat boses ay mahalaga. Sa pagtitipon ng mga guro, kawani, at estudyante mula sa lahat ng kampus, muling pinatunayan ng unibersidad ang pangako nito sa pagsusulong ng pagkakapantay-pantay ng kasarian at pagiging inklusibo, na angkop na pagdiriwang sa ika-62 na anibersaryo ng pagkakatatag ng SLSU sa ilalim ng temang “Pinagbuklod ng Husay at Serbisyo tungo sa Inklusibong Pagbabago”.

Plano ng GAD Office na ipagpatuloy ang mga ganitong uri ng seminar at pagsasanay upang mapanatili ng unibersidad ang nangunguna nitong papel sa pagsusulong ng gender sensitivity at inclusivity sa Pilipinas.